منتديات أشواقنا تحكي - المقلوبة العراقية (( تصويري ))

السلام عليكم ورحمة الله وبركاته

شلونكم حبايبنا

اليوم راح نطبخ المقلوبة العراقية وراح اكون وياكم خطوة بخطوة ؛؛ المقلوبة نكدر نطبخها بـ لحم هبر او دجاج ماتفرق ؛؛ على حسب الرغبة ؛؛ و غالبا ماتكون المقلوبة تشبه من بلد لبلد الفرق بس بالاضافات مثلا بلاد الشام يضيفون المكسرات مثل الصنوبر والجوز و الخليج يسونوها غالبا ع لحم او بالسمك و بالعراق اكو ناس يضيفون الطماطة والجزر والشجر (( الكوسة )) ؛؛

انا سويت المقلوبة التقليدية وسويتها على صدور دجاج ؛؛ ان شاء الله تعجبكم

المقادير

تمن كلاصين (( رز )) او حسب كمية الاشخاص

صدور دجاج ؛؛ او دجاجة كاملة

باذنجان على حسب كبره (( انا استخدمت وحده ))

3 بطاطا او على حسب الرغبة والحجم

3 بصلات

ملح

بهارات دجاج او اي بهارات مفضلة

هيل ؛؛ ورق غار

معجون طمامة

ونبتدي .. بسم الله

اول شي لو كنا راح نطبخ الدجاجة فـ اكيد انظفها ؛؛ انا استخدمت الصدور غسلتهم و حطيتهم بجدر وزودت عليهم هيل علمود الزفارة وورق غار وبهار دجاج (( لاتحطين الملح هسه علمود الدجاج يستوي بسهولة ))

ونخليها على النار ينسلق

وبهالاثناء نغسل الخضرا ونقشرها ونقطعها (( البيتنجان والبتيتة والبصل ))

و بهالوقت الدجاج ينسلق والخضرة خالصين من تقطيها نحط الزيت ع النار ونبدا نقلي وبنفس الوقت نغسل التمن (( الرز )) ونخليه منقوع

الدجاج مايطول بالسلق بس على نص الدرب نحط الملح ونتركه يستوي زين ولما يكمل سوى نشيله يتصفى ونكمل تقلاه ونطبخ بنفس السوب مال دجاج التمن علمود الطعم والدسومة بس ماننسى نشيل ورق الغار والهيل اذا في احد مايحبه بالاكل ؛؛

والتمن هنا يكون احمر لانه نضيفله المعجون

هسه خلصنا كل القلي (( الدجاج والخضروات ))

ونبتدي نرصهم او نحطهم طبقات بجدر بيه شوية زيت وانا ابتديت بالدجاج لانه يتحمل حرارة

وبعدين البتيتة والبصل

وهسه البيتنجان

ولما خلصناهم نجي نحط التمن (( الرز ))

انا غلفت الجدر بسليفون (( ورق المنيوم )) علمود يتبخر والي تحب تقدر تجرب تحط شوية زيت في صحن عميق شوي وتخليه بيه جمرة مشتعلة بنص الزيت وتخلي الماعون على الرز وتغلف بالالمنيوم وتحطه ع نار هادئة علمود يتهدر (( يمكن انتو تقولون يتسبك )) والجمرة بس علمود تنطينا طعم وريحة مقلوبة مدخنة ..

هسه نجي للمقبلات ..

انا احب اقدمها ويا الجاجيك (( سلطة خيار وثوم ولبن ))

فــ الطريقة سهلة

خيارة + ثوم + ملح وانا احب اضيف نعناع

قطعيهم ناعم وضيفي الملح والنعناع واخر شي اللبن وبالعافية

وهذا شكل الطبق النهائي

؛؛

ها شرايكم ؟؟

و الف عافيات عليكم