1
2
|
1
2
|
(-•♥ مواقف محرجه للعرسان ♥•-) ..
مرحباااااا كيفكم ..~
جبتلكم هالموااقف راح يعجبوكم لما وصلوني فاطسه ضحك ...,,,,, مواقف محرجه للعرسان والخطيبين يمكن تكون هالمواقف حلوه وتقربهم لبعض ويمكن تنقلب ضد واحد منهم ويروح بخبر كان.. لاكن تظل المواقف في راسهم وأنا راح اجيب بعض الاشياء الحلوه.. بقول لكم انا اول وحده بعدين قولو وش عندكم.. : مره كنت متملكه على ولد عمي وكنت استحي منه مررره ومره من المرات كنت رايحله في سااابع نومه جت اختي وصحتني وقالت : أحمد بيجي الحين. طبعا أحمد هو خطيبي.. قلت: ها ها ها العبي غيرها لأن احمد من طبعه يقولي قبل مايجي انه راح يجي وكان دايم مايجي الا المغرب وفوق علشان كذا ماصدقت احلام اختي بس لما قالت: والله العضيم انه بيجي نقزت من سريري ورحت بسرعه أخذ لي شور واتكشخ وأنا ميييته من الجوع.. وانا حالتي حاله دخل علي ابراهيم اخوي وقال: احمد جالس تحت في المجلس قلت لأرادي: كذااااااب قال: انقلعي كانك ماصدقتي.. رحت بسرعه اتمكيج وانا ملففه شعري فيما احلام تخلص من كوي التنوره وحالتي ذاك اليوم حاله.. المهم نزلت بعد شوشه وحاله.. ودخلت عليه وجلسنا نسولف وبعد شوي دخلت امي ومعها الغدا حطته وجلست تسولف معنا شوي بعدين طلعت.. جى احمد بيتغدا التفت علي وقال: تعالي تغدي قلت: لا شبعانه وانا مبققه عيوني على ذا الغدا .. بس علشاني استحي منه ماأقدر اكل عنده.. المهم جلس ياكل وأنا ابلع ريقي لما خلص قال: وش رايك نطلع نتمشى؟ قلت: هاه؟ كنت انتظره يطلع علشان أكل لأني ميته من الجوع قال: نطلع نتمشى؟ بحكم اني استحي قلت: كيفك.. قال: يالله انا بطلع فيما تلبسين عباتك رحت البس عباتي عند اهلي قلت لهم: مابقى من الغدا شي؟ قالو: لا ليه ماكفاكم؟ قلت: لا بس انا ماتغديت قالو: ليه طيب؟ توني بجاوب جى اخوي ابراهيم وقال: تاركه احمد في الشارع وجالسه تسولفين! يالله بسرعه رحت بسرعه وركبت السياره وجلس يسولف وانا ماني يمه يم يالبطن الي ينادي ويوم جت الساعه 5 وقف عند الكوفي وقال: عهود؟ قلت: هم.. قال: وش رايك نشتري شي من الكوفي.. قلت: لا لا شبعانه..كيفك كانك تبي انت قال: كيف شبعانه..وش اكلتي.؟ قلت: قبل ماأطلع لك شربت كابتشينو علشان كذا تأخرت عليك.. قال: براحتك بس انا بشتري لي نزل وجاب له وانا شوي واصيح من الجوع رجع ومعه قهوه تركيه ودونات بالكاكاو<واو> وجلس يسولف وياكل وهو يسوق وانا عيوني في ذا الي بيده جت الساعه 8 وانا حالتي حاله قال: وش رايك نروح لبيتكم؟ بسرعه قلت: ايه استغرب من ردي السريع ورحنا للبيت اول ما وقف على طول نزلت ورحت بسرعه عند الباب علشان ادخل اول ما دخلت المفتاح في الباب سمعت صوت السياره يطفي وطيرت عيوني وش يبي الحين لما فتحت الباب سكر باب سيارته انا هنا شوي واصيح بس من دون ماألتفت دخل وراي وقال: توني داق على ابراهيم يقول كلهم طالعين علشان كذا ماحبيت تجلسين لوحدك علشان كذا جلست قلت في نفسي ياليتك تخليني لوحدي بس اتركني أكل قلت: حياك..ادخل المجلس وانا بفسخ عباتي قال: خلاص راح وأنا على طول رميت عباتي ورحت اركض على المطبخ ادور على شي اكله بس للأسف مالقيت رحت عنده بأسى ويأس لمادخلت عليه قال: عهود انا طلبت لنا عشى من المطعم قلت في نفسي خلاص ماعاد علي منه بأكل..ياربيه مت من الجوع لو كنت عارفه اني بأجلس طول هالوقت ماطب في بطني شي كان صمت.. المهم جلس يسولف وانا ماني معه انتظر هالجرس يرن يافرحتي يوم رن الجرس بغيت اقوم انا وأجيبه بس قام احمد وجلست انتظره لما دخل والعشا معه وكان رز بخاري يوم حطه قال: يالله تعالي ابي اتحرك.. ابي اتعشى.. ومافيه امل ماقدرت من الحيا وقلت: لا ماأبي قال: وانا كل ماقلت لك قلتي لي ماأبي او شبعانه وش تاكلين عاجبك شكلك كذا كأنك مسواك قلت وانا عيني في هالرز: لا هههه بس انا ماأحب هالرز قال: اجيب لك واحد ثاني؟ قلت: لا اصلا اول ماجينا لقيت اهلي حاطين لي غدا وحميته وأكلته طير عيونه وقال: متي؟!!!!!! قلت: قبل شوي.. قال: قبل شوي!!!!!!!!!!!!!!! قلت: إيه.. استغرب هو لأنه مايمديني احميه وأكله جلس ياكل وأنا سعابيلي سايحه وجالسه الوم نفسي علشاني ماأكلت المهم خلص وكان قايم يغسل وقمت معه ومعي فوطه علشان يمسح يده لما اخد مني الفوطه وقال: اوكيه عهود..انا لازم اروح قلت لاإرادي: مع السلامه طير عيونه فيني بأستغراب لأني العاده الزم عليه يجلس عندنا قال: بس لازم نشيل حوستنا هاذي ونوديها للمطبخ قبل تذبحنا امك قلت : خلاص.. رحنا وشلنا حوستنا ووديناها للمطبخ طلعت وتوجهنا لباب الشارع بس ماقدرت حتى اصبر اوصله عند الباب رحت اركض للمطبخ وعلشان اكمل العشا الي بقا منه احمد هنا صار ناسي مفاتيحه في المجلس وراح ياخذها وهو طالع كان يعاطس ومرني وانا في المطبخ انا في ذاك الوقت أكل بشراهه مو طبيعيه وبشفاحه عضيمه وكأني طايحه من السماء لما خلصت من الاكل مسحت فمي بكم بلوزتي تنهدت ولفيت وشفته واقف عند الباب ومبتسم طيرت عيوني من الروعه وشهقت وحطيت يدي على فمي قال: نسيت مفاتيحي بالمجلس ورحت أخذها وأنا طالع عطست وقلت اكيد بتخاف لما تسمعها وبيجي على بالها حرامي قلت اجي اطمنك مادرى اني من الفتنه على ذا العشا مادريت عنه وعن عطاسه قال: ليه ماقلتي لي انك جوعانه نزلت راسي وماقدرت امسك نفسي وجلست اصيح قال: عهود ليه تصيحين؟ كملت صياحي من الفشيله قال: ماقلتي ليه ماقلتي جوعانه!!!!! قلت وانا اصيح: مستحيه قال وهو يضحك: مستحيه!!!!!مستيحيه مني انا!!!!!!!!!! جلست امسح دموعي قال ويتهزى بي: ماأحب هالنوعيه من الرز جلسنا نضحك اناوياه بس هالموقف عمري ماانسناه لأنه هو الي قرب بيني وبين احمد وصرت اكل قدامه خصوصا بعد الزواج والمشكله احيانا اكون صدق شبعانه بس مايصدقني على الرغم اني اقنعه اني إذا جعت بأكل بس مايقتنع رغم ان البنت إذا استحت منه ايام الخطبه ماتقدر بعد الزواج لأنها مراح تصوم طول عمرها ٠ ٠ ٠ ٠ ٠ ٠ ههههه بصراحه موتيني من الضحك ياعهود.. يالله رحمتك.. تصدقين ذكرتيني بموقف اخوي لما جى يخطب كانت طلاباته مره صعبه مثل ابيها برونزيه ماأبيها بيضاء تفقع عيوني ولا عبده ماأفرق بين يدها وكم عبايتها ابيها مربربه.. ماأبيها عصلا إذا مريت بجنبها أنكسرت من خفت جسمها ولا دبى إذا مرت هي بجنبي تكسرني.. ابيها مملوحه..موحلوه طول عمرها شايفه نفسها لأنها عارفه انها حلوه .. ولا شينه ماأقدر انوم الليل من الرعب.. ابي عمرها 25 سنه ماأبي أصغر بين كل ليله وضحاها تبطبط ذا الدمعتين تبي ترضع من امها ولا اكبر ترضعني انا وياكم..<< يقصدنا ياخواته.. فالمهم على ذا الطلبات الغريبه عجزنا نقنعه انه يغير الطلبات بس مافيه فايده المهم كل ماخطبنا له وحده وشافها قال ماأبيها.. المهم مره لقينا وحده نفس الطلبات وكأنها مفصله له قلنا له قال لنا والله إذا ماصارت الي راسمها في بالي مراح اتزوج ابدا" مسكين من كثر ماخطبنا له المهم راح علشان يشوفها الشوفه الشرعيه.. لما دخلت عليه وشافها وكانت فعلا مثل ماطلب راح المسكين وباس راسها من الفرحه والمشكله إن اخوها وابوها فيه أخوها مااات من الضحك في نفس الوقت عصب عليه وابوها عصب والبنت لاتسألون عنها وحتى اخوي الي مات من الفشيله لاتسألون عنه بس ابشركم تزوجو ٠ ٠ ٠ ٠ ٠ ٠ وااااو مسكينه ياعمري رحمتها بس بصراحها موضوعكم روعه ذكرتوني بسالفة اختي يوم شوفتها كان داخل معها اخوي هي من الفشيله راحت مدت يدها بتسلم عليها هنا صرخ اخوي مع الخطيب وهم يضحكون رغم انهم يحاولون قدر المستطاع انهم يمسكون نفسهم بس ماقدر وكان الخطيب يصير صديق اخوي يعني اجتمعو على المسكينه الي طلعت وهي تصيح بعد يومين جىنا وخطبها رسمي ٠ ٠ ٠ ٠ ٠ ٠ آآآه اوجعتي راسي من كثر الضحك.. يوووه لو اقولكم سالفه لولد خالي بتنهبلون في الملكه وكلنا حاضرين وكنا في بيت اهل العروس عرفتو كيف؟ المهم قالو اطلعو من الغرفه لأنه بيدخل يوم دخل كانو اهله واهلها فيه وكانت العروس لابسه فستان احمر المهم طلعو وخلوهم مع بعض ولوحدهم جلسنا ننتظره يطلع وماطلع جلسنا وماطلع جلسنا وماطلع جلسنا وماطلع جلسنا وماطلع جلسنا وماطلع <<شلكم بتذبحوني.. المهم بعد ماطلع وش تتوقعون صار؟!!!!!!!!!!!!!!!!!!!!!!!!!!!!!!!!!!!!!!!!!!!!!! ماصار شي <<هاهاهاهاهاهاها لا امزح تخيلو طلع مابقى مكان في وجهه روج يعني بوسات كان بأمكانه يمسحه قبل مايطلع بس هو من النوع الي يحب الفشخره ويعنني شوفوها باستني.. تخيلو طلع عند الرجاجيل كذا حتى شماغه ماخلى منه.. والمشكله ان البنت تستحي من ظلها .. وش سوى لها علشان تسوي كذا؟!! والبنت طلعت وجهها احمر ومستحيه ومتفشله وطايح وجهها و..و..و..<< انتم عاد كملو سألناها وش السالفه قالت مافيه شي الله يعين العزوبيات ٠ ٠ ٠ ٠ ٠ ٠ يالله وش سوى هالسكني بسم الله.. بس تذكرت يوم جى خطيبي لشوفه الشرعيه كنت مستحييييييييه مررررره وقلت لأبوي اني مراح ادخل المهم بعد محاولات منه وعلشان ادبر اي سبب علشان ماأدخل قلت توني ماكله بطاطس بلبصل قال وخير انشالله وش ناويه تسوين معه؟ طاح وجهي وتفشلت بس عقب هالموقف صرت اسمع اي كلمه من ابوي بدون اي نقاش علشان ماأسمع شي يطيح وجهي ٠ ٠ ٠ ٠ ٠ ٠ يالله تستاهلين اسمعي كلام ابوك مره ثانيه هذا عقاب لك لا تخيلو صديقتي شوفتها الشرعيه غير شكل تخيلو جالسه تكنس وتغني وكشتها طايره وتستعمل عصاء المكنسه كأنها ميكرفون والاخ في الله يناظرها مع اخوها وبعد يومين جاها وخطبها.. ٠ ٠ ٠ ٠ ٠ ٠ يووووه ذكرتيني بسالفة البنت الي رايحه لصديقتها وصديقتها هاذي كان ودها تخطبها لأخوها.. المهم قالت لأخوها يقز عليها من الشباك وهي وصديقتها كانو جالسين يسولفون وكانت تعطي صديقتها شكولاته وهي مسويه لي ادب وتقول ماأبي ماصدقت على الله تطلع هالبنت علشان تملى شنطتها بالشكلوتات والاخ في الله يجالس يتفرج.. وعجبته خطبها وعقب الزواج سألها وش اخبار شكولاتاتنا الي في شنطتك؟! هي في ذاك الوقت بغت تنهبل ٠ ٠ ٠ ٠ ٠ ٠ ايه اعرف هالسالفه بس ماأدري كانك قد سمعتوها ولا لا بتجيكن السالفه فيه عروس وزوجها في اليوم الثاني من زواجهم ركبو سيارتهم وراحو للدمام المسكينه كانت بتموت وتبي الحمام<< اكرمكم الله.. مررررره تبيه ومستحيه تقوله والرجال يسوووولف والبنت مو معه عيونها في هالمحطات الي يمرون بجنبها المهم بعد وقت طووووويل قالت له بأركب ورى علشان إذا جاني النوم انوم قال براحتك وقف على جنب وركبت ورى وأخيييييرا" وقف عند المحطه ونزل للبقاله وهي ماصدقت على الله ونزلت لدوره المياه الي هي فعلا" يسمونه بيت الراحه.. الشيخ هناك توه طالع من البقاله وركب السياره ورااااااح .. والرجال داقه سوالف على باله انها ورى والزينه طلعت وهي مرتاااااااحه بس يافرحه ماتمت لفت يمين ماشافت سيارته لفت يسار ماشافت سيارته ومره ثانيه لفت يمين ماشافت سيارته لفت يسار ماشافت سيارته بغت تنهبل ماتدري وين تروح << على فكره هالسالفه قديمه.. يعني مافيه جوالات.. المشكله ان المحطه مافيها غير هنود بس الحمدلله الله فرج وجى عند المحطه جمس اسود.. قالت في نفسها إذا كان فيه حرمه مالي بعد الله غيرهم .. بس لو كانو رجاجيل حتي لو كانو بلحيتهم مراح اركب بس الحمدلله صار الجمس شايب وحرمته وبناته طقت الشباك عليهم فتحته امهم البنت قالت داخله على الله ثم عليكم..تكفون ساعدوني الشايب قال خير يابنتي وش السالفه قالت البنت لهم السالفه والحمدلله صارو الناس طيبين واهل خير قالو اركبي علشان نلحق عليه قبل مايبعد ركبت وراحو مسرعيين وسألها عن نوع السياره وموديلها ولون السياره وكل مامرو عند سياره سألوها هذي؟ قالت لا الييين قالت ايه هذي جلس الرجال يكبس له بالنور.. والشيخ هناك جالس يسولف وعلى باله مستحيه علشان كذا ماترد انتبه علي السياره الي تكبس له من وراه طنشها لأحظ ان السياره مصممه عاند واسرع ولاكن السياره اسرعت وراه وتزيد في التكبيس في الأخيرقرر انه يوقف يتفاهم معه وقف السياره على جنب وأخذ معه العجراء نزل معصب وقال خير انت وش تبي قاله هالشايب هد اعصابك ياأبوي انا عندي لك امانه وبرجعها لك.. قال بأستغراب أمانه!!!!!!!!!!!! قال الشايب ايه انزلي يابنتي وتفاجاء الرجال بوجود زوجته معه قال الرجال ليقيناك ناسيها في المحطه هههه شكلك ياولدي متعود على العزوبيه قال المعرس مشكور ياشيخ وماقصرت ومعليش تعبناك معنا قال الرجال لاتعب ولا شي وبعدين هاذي حسبة بنتي وكلنا عيال ديره وحده وانتبه يابوي على زوجتك قال ابشر قال يالله اجل بروح انا مع السلامه قال مع السلامه وراح ركب السياره مع زوجته وهو زعلان عليها وقالت له السالفه وأعتذرت له وبدال ماكان هو الي يسولف وهي الي طرما صار هو الي اطرم وهي الي تتكلم ٠ ٠ ٠ ٠ ٠ ٠ يالله تخيلت نفسي في مكانها بس تصدقون فعلا احيانا يكون واحد من الثنين يروح بخبر كان مثل هالسالفه واحد من اهم شروطها وأولها والشرط الوحيد شعرها لأزم يكون تسواده سواد ليل نعومته مويه طوله طرحه كثير بألأختصار شعر زينب العسكري المهم لقو له اهله وحده كذا وفي ليلة الدخله وهي بتفك تسريحتها هو كان جالس يطالع هالشعر الي منهبل عليه ومنجن عليه بس بداء يطيح حبه حبه شعره شعره خصله ورى خصله خصله ورى خصله اليييييييين حت شعر هالمسكينه وطلعت صلعه بسب عين الزوج الي ماذكر الله ٠ ٠ ٠ ٠ ٠ ٠ يألله المفروض الي كذا عينه حاره لايتزوج بس هالموضوع روعه بقولكم سالفه صارت لواحد من جماعتنا بس قبل ماأبدى بسألكن سؤال وش ردكم لو قالولكم أزواجكم اطبخو في ليله عرسكم ؟!!!!!!!!!!!! هذا الي صار لهم اول مادخلت غرفتها النوم في ليلة الدخله وجلست على سريرها ومستحيه جلس بجنبها بعدين رن جواله ورد كل أتي الو_ هلااااااوالله_الله يبارك في عمرك_ امين عبالك_ زين انكم جيتو_ الله يسلمك_ وينكم فيه الحين؟_ تعشيتو؟_لاعاد !! بتمشون ماتعشيتو؟_ لاوالله تجون تتعشون عني_ يابن الحلال حلفت _ عادي بس تعالو_ خلاص؟_انتظركم _ يالله مع السلامه.. سكر السماعه والتفت عليه الي مطيره عيونها وقال_ شوفي اصدقائي الي من الدمام بيجون وانا بروح اجيب حاجات معليش بس ماحبيت يمشون من هنا لدمام على لحم بطونهم خلاص جلست المسكينه تناظره بعدين طلع جلست تحنش وتسب وتلعن بينها وبين نفسها ولما جى صار رايح لبنده وجايب زيت وبصل وطماط وملح و و و الخ المهم قال كل شي عندك ياعمري يالله ابي اكله من إيديك الحلوه هاذي قال هالكلمه ورن الجرس قال اوح شكل الربع جو بأروح افتح لهم ابي شي دسم خلاص؟ راح فتح لهم الباب وجلسو في المجلس والمسكينه في المطبخ تقطع بصل وبفستان الزواج تخيلو وقالبتها مناحه وصياح وشهاق ووعود وتهديدات إذا راحو هبالبلشه الي جايين في اول يوم لزواجهم وتهدد وتقول هين بأخلص العشاء من هنا وبأروح لبيت اهلي من هنا وتتمنى لو فيه سم تحطه في العشاء المهم بعد ماتعشو وراحو دخل عليها الي كانت واقفه ويدها على خصرها رمى كيس على السرير طالعها وأبتسم توها بتتكلم قاطعها وقال شوفي هالكيس فيها خمسين الف لك هديه من اصدقائي لأنهم تحدوني إذا خليتك بتبخين في ليلة الدخله ولا لا وعلشانك ماقلتي ولا كلمه ولا نقطقتي بولا حرف كل هاذي لك استانست البنت وخلاص طاح الحطب وكملو ليلتهم.. ٠ ٠ ٠ ٠ ٠ ٠ الله ياليت زوجي خلاني اطبخ وعطاني خمسين الف بس ذكرتيني بسالفة صارت لبنت جارنا تخيلو اول ماتدخلون بيتكم في ليلة الدخله وتحملون مسؤليه بزر!!!!!!!!!!!!!!!! هذا الي صار للمسكينه لما دخلت الشقه مع زوجها بفستان زواجها لقو بزر على السرير ارتاعو المعاريس لما شافوه والمعرس جلس يدقق على اهله يشوف وش السالفه وكلهن يقولون ماندري بعد مده جى صديقه وخذ البزر الي يصير ولده صارو اصدقاء الانذال مسوين فيه مقلب ٠ ٠ ٠ ٠ ٠ ٠ مسااااااااااكيييييييين بس ذكرتيني بذيليك الي لما دخلو غرفة النوم في ليلة الدخله سمعو صوت يطق الدريشه هي من الروعه رمت نفسها عليه بعدين لما حست بنفسها تعدلت الشيخ هنا عجبه الوضع راح يطل مع الدريشه شاف اصحابه مسوين فيه مقلب يبون يروعون بس قال لهم عيدو الحركه عيدوها هنا اصحابه انفجرو ضحك لأنه واضح انه استفاد من هالحركه ٠ ٠ ٠ ٠ ٠ ٠ ايييييه ذكرت سالفة بنت عمي يوووووه ياهي فشيييله تخيلو لما جت الشوفه الشرعيه طبعا كان جالس في المجلس وكان فيه تلفووووون والـسلك حق التلفون طووووويــل لما دخلت ومنزله راسها وتلعب بأصابعها وحالت البنت حاله ويــلـــف سلك التفون على رجلها<<هههههه المهم لما لف السلك على رجلها طبعا الحلوه ماعرفت تمشي وتجي بتطيح<<ههههههههههاااااااي معليش بس تذكرت شكلها لأننا كنا انا وخواتها نطل عليها مع الدريشه.. المهم ماعلينا... الحلو هنا يقال له خاف انها تنكسر ويجيك طاااااااايييييييرررررر ويمسكها علشان ماتطيح لما رفعت راسها ووجها طااااايح بس هو لما شاف وجهها كيف طايح تركها ونزل راسه والي قاهرني ان اخوها واقف معبهم بس صمن بكمن عمين لا حركه ولا كلمه ولا شي هي على طول راحت تركض وهي تصيح لأنها من زمان كانت تحبه وتتمنى هاللحظه ويوم جت بغت تطيح كنا في ذاك الوقت ساكتين وفقدنا الامل في موافقته بس بعد يومين بالكثير قال انه يبيها والحين باقي اسبوعين زواجها بس كل ماتذكرنا شكلها جلسنا نضحك ونعلق وهي تعصب وحتى هو كل ماتذكرها ماااات من الضحك يابناااااات انتبهو إذا جى احد يخطب ويبي يشوف ارفعو اسلاك التلفووون والحين انا خايفه من كثر ماضحكت عليها خايفه يجيني..ماجاها اللهـم سترك .. ٠ ٠ ٠ ٠ ٠ ٠ ٠ هاهاهاهاهاهاهاهاهاهاهاهاهاهاهاهاي يالله طاحت دموعي من الضحك بس ذكرتيني بسالفة الي جاي يخطب وهي ماتدري يعني طلب من أخوها انه يشوفها بس مايبي يشوف وحده داقه الزين ووخر عنها لا يبي وحده على طبيعتها والمشكله ان البنت هذي قمه في الرجه والاستهبال المهم اتفق مع اخوها انه يركب السياره وينزل ويخلي أخوها يدخل السياره في البيت ويركب في صندوق السياره مقاضي البيت وتجي هي الي تشيلها نفذو خطتهم اول مادخل السياره ناداها حصيييييييييييييييص << انا ما اعرف اسمها بس علي سبيل المثال حصه.. جت تركض خييييييييييييييير قال يالله شيلي الاغراض وديها للمطبخ قالت وش قالو لك خدامه ولا خدامه؟ قال قلت لك وديها يعني وديها بلا نقاش زايد قالت قلت لك لا يعني لا بلا نقاش زايد قال حصوصي يالله حبيبتي شيلي قالت اسفه ماأشتهي المهم بعد محاولات وترجي وافقت المعزبه والاطخم في السياره جت تاخذ كل غرض على طريقتها الخاصه الي تجنن مثلا كرتون الببسي تاخذه وتفحط به والشيخ مستاااااااااااانس ولا وده تخلص هالاغراض ويقول في نفسه ياليتني عطيته زيادة فلوس علشان يكثر الطلبات وتتأخر في الشيل بس انهبل على شطانتها وجمالها الطفولي وعفويتها وحركاتها البريئه واليوم الثاني على طول خطب رسمي ٠ ٠ ٠ ٠ ٠ ٠ الله شي ياليت زوجي خطبني بهالطريقه لأنه اهون من الي صار لي في يوم زواجي جايه داقه الزين وكااااااشخه وخرو عني دخلت معه وجلست على الاريكه ومستحيه وحالتي حاله وعاد انا من النوع الي اذا استحيت اضيع وجهي ولاعاد اعرف اتكلم ويصير فيني غبااااااء ماتتخيلون كيف المهم جلست على الاريكه وجى وجلس معي يسولف بعدين قال لي اشربي عصير قلت بثقه لا ماأحب عصير الطماط قال وهو يضحك اي طماط هذا عصير مشكل هنا طاح وجهي وماعاد عرفت اتكلم بس زوجي الحين كل ماجاب عصير مشكل قال جبت لك عصير الطماط بس من جد فشيله ٠ ٠ ٠ ٠ ٠ ٠ ههههه على طاري العصير انا لما جى زوجي بيشوف الشوفه الشرعيه هو كان يبيني اتكلم وكنت جايبه عصيرين فواكه من نفس النوع سألني هذا وشوبه؟ قلت بصوت يالله ينسمع فواكه قال ايش ؟ قال ابوي فاكهه قال اها طيب والثاني اصلا الثاني نفس الاول من نفس العصير قال ابوي هذا ببسي هو طير عيونه في الكاس وقال الحين مو هذا فواكه مثل الاول قال ابوي مدامك عارف ليش تسأل انا ماقدرت امسك ضحكتي بعدين ضحكنا كلنا ولما طلعت سألتني امي وين فليتها مع الرجال قلت لو تعرفين يايمه صارت سالفتنا هالعصير وكأنه جاي يشوف العصير مو انا وجلسنا نضحك ذاك اليوم ضحك والحين مالي الا شهرين من تزوجته وكل شوي مذكرني بالسالفه ٠ ٠ ٠ ٠ ٠ ٠ لا اسمعو سالفتي في ليلة زواجي دخل مرتبك وانا مرتبكه وحالتنا ياذا الثنين حاله عاد المفروض هو الي يبدا بالكلام ماعاد عرف وش يقول قال(وش اسم اخوك صالح؟؟!!!؟؟!!!؟؟!!!؟؟!!!؟؟!!!؟؟!!!؟؟!!!) انا هنا ماقدرت امسك نفسي ومت من الضحك وجلس يضحك معي وعقب هالموقف جلسنا نسولف عادي بدون ارتباك ولا خوف ٠ ٠ ٠ ٠ ٠ ٠ حللللللللللللللوه وش اسم اخوك صالح.. لا اسمعو سالفة اخوي الي يكسر الخاطر هو خطب بنت خالتي وجلس طوووووووول ذا الايام يعد ويمحى لذا العرس وعاد ياشين الايام إذا عرفت انك تبي هالشي تطول ماتروح.. جى يوم الزواج ودخل عليه وجلست بجنبه وكانو اهلها فيه مابعد راحو وكانت ترتجف من الخوف مسكينه المهم يوم جو اهلها بيروحون وتتعنقط فيهم الا أروح معكم يابنت الحلال اعقلي ومافيه امل راحو وتركو أوخيي لحاله في هاليله وبغى يموت من القهر بسم الله على قلبه ٠ ٠ ٠ ٠ ٠ ٠ لا يوم تزوج اخوي راح مع زوجته للمدينه وراحو للفندق قال لها أخوي : ما بقى وقت علشان ننوم وش رايك ننزل للحرم نتهجد الين يذن الفجر علشا ماتفوتنا الصلاة ماقالت شي راحو على رجولهم ولما وصلو قال : خذي مفتاح الشقه إذا صليتي ارجعي انا بجلس الين شروق الشمس بعد ما صلت طلعت تمشي وتمشي وضيعت الفندق وهي ماأنتبهت له ولا لأسمه.. وماتعرف من وين رايحه ولا من وين جايه وجالسه تصيح من كل قلبها هالضعيفه شافها شرطي وهي تشاهق من الصياح جلس يدور معها جزاه الله خير اليييييييين الظهر وفجأه شافت اخوي هالفاهي والله يعلم بحالت هالمسكيييييين ومن فرحتها به طاحت مغمي عليها وما صحت الا اليوم الثاني بس لما قالو لنا السالفه جلست اضحك ضحك موب طبيعي ٠ ٠ ٠ ٠ ٠ ٠ بأبدى سالفة اختي بقوله ياإما حبى ياإما برك هذي ينطق على اختي الي تستحي من ظلها ويوم تزوجت يالله يالله تنطق معه بحرف واحد قلنا لها امزحي معه استهبلي ولا تراه بيمل منك خافت انه فعلا يمل منها ويوم جى يوم من الايام كان ينزل مع الدرج وحبت تمازحه ودفته وجيك متكرررررررررررفس مع هالدرج الييييييييييييييييييييين اغمى عليه ٠ ٠ ٠ ٠ ٠ ٠ يوووووووووه فشيله ذكرتيني ببنت جيراننا هالبنت مصرقعه والبيت كله صرقعه في صرقعه البنات والاولاد كلهم خبال يعني الواحد مايعرف يجلس بأمان مثلا وحده تمشي يجي واحد من اخوانها يحط ساقه قدامها علشان تطيح وتجي هي تردها وتفزع لها اختها يعني البنات حزب والشباب حزب بس كلها مزح مو جد المهم تزوجت بنت عندهم وفي ليلة دخلتها وهي جالسه على سريرها ومستحيه جي زوجها يمشي قدامها ولاإرادي حطت رجلها ويجيك طايح على وجهه وجاها طق ذاك اليوم الين تابت من هالمزح ٠ ٠ ٠ ٠ ٠ ٠ ذكرتيني بسالفة وحده من جماعتنا كذا مع اهلها بس الفرق انهم يسحبون الكرسي إذا جىالوحد بيجلس وهالبنت اليوم الثاني من زواجها ويوم جىبيجلس وتسحب الكرسي بعفويه ويطيح في الارض ويلتفت عليها ويعطيها نظره ويقوم ويعطيها ذاك الطراق الي نساها اسمها ٠ ٠ ٠ ٠ ٠ ٠ . |
وااااااااااااااااااااااااااااااااااااااااااااااااا ااااااااي يابطني ..
تفقعت من الضحك .. يسلمو يا قلبوو .. لا عدمناك .. |
ههههههههههههههههههههههههههه
الله يستر من المستخبي |
يا حليلهم ههههههههههههههه
يسسلمو خيتوو تقبلي مروري .., |
.. يسلمو يا قمر ..
:3: |
يسلمو على مروركم الذي انار متصفحي ... كنتُ هنا {..خواطر شوق |
هههههههههههههههه
يسلموووووووو |
| الساعة الآن 01:28 AM. |
1
2
|
Powered by vBulletin® Version 3.8.4
Copyright ©2000 - 2024,
Jelsoft Enterprises Ltd.
جميع مايكتب هنا تدل على كاتبها ولاتدل على منتديات أشواقنا تحكي والله الموفق